Donosti Cup eta Rural Kutxak babes-akordioa berritu dute

Donosti Cup-ek eta Rural Kutxak babesletza-akordioa berritu dute hurrengo ediziorako. Horri esker, kreditu-kooperatibak Donosti Cup-en babesle ofiziala izaten jarraituko du, bai eta txapelketaren finantza-erakunde ofiziala ere. Akordioa berritzeak jarraipena ematen dio 2023tik bi erakundeak lotzen dituen harremanari.

Donosti Cup - Rural Kutxa bekak 

Gipuzkoako gizartearekin eta oinarrizko kirolaren garapenarekin duen konpromiso sozialaren erakusgarri, Rural Kutxak Donosti Cup - Rural Kutxa bekak babestuko ditu berriro ere. Kirol beka hauen hartzaileak txapelketan parte hartzen duten Gipuzkoako gazte guztiak dira, herrialde ezberdinetako gazteekin kirol esperientzia bizitzeko doako aukera emanez. Beka hauen eskaera oso erraza da, eta beharrezko informazio guztia txapelketaren webguneko "Etxeko taldeak" atalean egongo da eskuragarri.

Kiroltasuna sustatzeko programa

Jokalarien, entrenatzaileen eta senideen arteko errespetua sustatzeko eta kiroltasunaren aurkako edozein jokabide prebenitzeko helburuarekin, aurten Donosti Cup-ek programa berritzaile bat bultzatuko du. Programa horrek prebentzio-, sentsibilizazio-, ebaluazio-, detekzio-, esku-hartze- eta sari-faseak jorratuko ditu, kirolaren balioak ardatz hartuta, hala nola joko garbia, aurkariarekiko eta arbitroekiko errespetua, bai eta zelaiaren barruan zein kanpoan jokabide eredugarria izatearen garrantzia ere. Kiroltasunarekiko konpromiso hori indartu egingo da Rural Kutxaren parte-hartzearekin, eta sari berezi bat emango die txapelketan balio horiek hobekien gorpuzten dituzten hiru taldeei.

Beste behin ere, Donosti Cup eta Rural Kutxaren arteko elkarketak kirol babesak gizartean eragin nabarmena izan dezakeela eta kirola egitea susta dezakeela erakusten du. Txapelketaren antolakuntzatik gure eskerrik beroena eta harroena adierazi nahi dugu Rural Kutxaren baldintzarik gabeko babesa izateagatik, konpromiso sozial eredugarria duen kooperatiba baita.