Ezagutu ezazu sakonean Donosti Cup: Langileen ahalegina eta dedikazioa txapelketaren arrakastaren atzean
Nahiz eta Donosti Cupek astebeteko iraupena izan, neurri honetako txapelketa bat burutzeko, aurreko edizioa amaitzen denetik hasten da lanean. Horregatik, garrantzitsua da txapelketa honen prestaketaren zailtasunaz eta egiten den lan gogorraz jakitea.
Donosti Cupen, ekitaldi eta txapelketa guztietan bezala, prestaketa-aldi bat dago, eta hori funtsezkoa da behin dena martxan jarrita dagoenean arazorik egon ez dadin. Donosti Cup nazioarteko txapelketa da, eta hogeita hamaikagarren edizio honetan, 865 taldek eta 13.000 jokalari inguruk hartuko dute parte. Horren guztiaren ondorioz, Donosti Cup oso txapelketa erakargarria da atzerriko zein bertako taldeentzat. Gainera, Donostiako eta inguruko herrietako turismoarentzat nahiko garrantzitsua da, Gipuzkoa ezagutzen ez dutenek bertako paisaiak ezagutu ditzaten, txapelketak dituen 53 egoitzetatik 50 Gipuzkoan baitaude.
Oso polita eta konplikazio handirik gabekoa badirudi ere, ez da batere erraza horrelako txapelketa bat antolatzea. 2.150 partida 80 zelai desberdinetan, horietako batzuk ordu berean eta futbol partidu ugari egun berean. Horregatik, 2022ko edizioa amaitu zenetik, Donosti Cupeko langileak hurrengo urteko edizioa prestatzen hasi ziren, urtero txapelketa hobea eta anbizio handiagokoa izan dadin. Urte osoko lana aste bete irauten duen txapelketa baterako, gehiegizkoa badirudi ere, dena primeran atera dadin xehetasun guztiak landu behar dira, eta horretan oso trebeak dira Donosti Cupeko langile guztiak.
Esparru desberdinetako langileak pixkanaka-pixkanaka hasten dira lanean, modu mailakatuan, atal bakoitzak eskatzen dituen beharren arabera. Urtero lanean hasten diren azkenetakoak taldeen gidariak eta futbol zelaietako ordezkariak dira. 500 lagun inguruk egiten dute lan bi lanpostu horietan, eta Donosti Cupeko taldeen, gehienbat atzerritarren, egonaldia atseginagoa izatea da haien helburua. “Gure helburua talde guztiei argibideak ematea eta laguntzea da, baina egia da atzerritarrengan jartzen dugula arreta gehien, horiek baitira laguntza gehien behar izaten dutenak”, esan nahi izan digu Pablo Bareak, Donosti Cupeko txapeldun izan den donostiar gaztea. Aurten futbol zelaietako ordezkaria izango da. “Gure ekarpen txikiaz gain, Donosti Cup ahalik eta modu onenean ospatzeko urte osoan egiten den lana harrigarria da”, dio Pablok.
Horretaz gain, Donostiako Udalaren laguntzarekin, hainbat ikastetxe eta erakunde publiko ostatu bihurtzen dira talde askorentzat. Antolatzaile, laguntzaile eta langile guztien lanari esker, parte-hartzaile guztiek egonaldiaren eta txapelketaren oroitzapen atsegina eramaten dute. Laburbilduz, Donosti Cup futbolaz haratago doan lehiaketa huts bat da, askorentzat oroitzapen ezabaezina bilakatuko den aste paregabe bat baizik.
